من أجلك أيها الحق...أعشقك أيتها الحرية

والدي....رحمة الله عليه.....كان عنده مكتبة ضخمة...أكترها إسلامية و ناصرية....المكتبة دي ربت لي حالة من القراءة الغريبة...عندنا في بورسعيد...بلد الشبار....بنحط ورق جرايد على الترابيزة علشان السمك و الحاجات دي.....يبقى أنا مش حقوم من الأكل إلا بعد العشا...لأني حضطر كل ما تقع عيني على عنوان مقال...حقراه...حتى لو قريته قبل كده مليون مرة

وده اللي خلاني أورث المكتبة و أضيف عليهامن كل الأشكال....قراءات في الأديان الأخرى.....ثقافات معاها و مش معاها....اللغة العربية و جمالها.....حتى الجنس(العلمي)...كان ليا قراءات فيه

و مرة...من ذات المرارير.....كنت بتجول في معرض كتاب...بدور على حاجة أصرف بيها اللي معايا و أروح على رجليا

وإذا به يطل علي....كأنما سقط من كتفي...حلوة الجملة اللي فاتت دي

ماتكلمش....و الله ما نطق....مسك الكتاب اللي في إيدي....و بصله بصه...متهيألي الكتاب جتله حالة نفسية من البصة

و بعدين حطه على جنب...و مسك كتاب تاني.....و كأنه حيتجوزه.....إيه نظرة النعيم و الرضا و القبول دي!!!

و إدهولي في إيدي..و كأنه بيسلمني تاج الجزيرة.....و طبعا قدام الشرف اللي أنا نولته...إبتسمت...إبتسامة من القلب....بسعادة الشهيد....و أخدت الكتاب اللي هو إداهولي....و حطيته على جنب و أخدت الكتاب اللي هو أخده مني و بعده...ورحت على الخزنة أحاسب و مشيت

و الله العظيم يا جاكي لانا عارف الكتاب اللي إشتريته إيه.....ولا الكتاب اللي أنا رميته إيه

بس اللي أنا عارفه و متأكد منه....إني كنت حر......في إختيار الكتاب..اللي حقراه...ويمكن المرة الجاية يعجبني نفس الكتاب اللي أنا رميته...بس ساعتها..حكون أنا برضه إللي إخترته

يمكن الموضوع ده جه في ذهني.....لما تابعت موضوع البهائيين في الأوراق الرسمية....و تابعت محاكمة كريم

حسيت إنهم...سواء البهائيين...كريم..أو حتى الإخوان المسلمين..هما الشخص اللي صادفته في معرض الكتاب....بس المرة دي...تبادلنا الأدوار......حاولت أرغمه أنا على إنه يقرا كتاب هو مش مستظرفه دلوقت...ممكن يستظرفه بعدين...ممكن مايستظرفوش خالص...ممكن يكون مستظرفه دلوقت...بس التحكمات بتاعتي...إستحالة يقبلها

من حقه يبقى حر...الحق....و الحرية......و من حريته...يقدر يشوف الحق...الحق نسبي...بس ليه نقاط إلتقاء...محتاجة حرية...علشان نوصل لها

علشان الحق....لازم حرية.....و أنت حر مالم تضر

إيه المانع لما يكون حد على غير ديانتي....والكل عارف إنه على غير ديانتي.....و هو عايز يقول إنه على غير ديانتي

إيه المانع لما يكون حد بيقول أن إنا مش صح....و مش حيعمل زيي علشان هو شايف إن اللي بعمله مش صح

إيه المانع لما يكون حد بيقول أنا عايز أقول حاجة..زي مانتا بتقول برضه حاجة.....ولا إنت بتقول حاجة و أنا بقول أي حاجة!!!!؟؟؟؟؟

الحرية

الحرية لكريم

الحرية لخانة الديانة

الحرية لقيام الأحزاب

الحرية للوصول للحق بأسرع و أسهل وأأمن الطرق

الحرية حق