كل سنة وإنت كويس
و كل سنة تبقى الريس
وكل سنة زي مانا
يا إما مضروب يا مفلس
و كل سنة تبقى الريس
وكل سنة زي مانا
يا إما مضروب يا مفلس
و كل سنة أقول تتعدل
تقوم تخليها تتقندل
وكل ما تقول فيها تغيير
بتيجي برضه و تستندل
وكل سنة شايل سيفك
و بكيف كيفك
تدبحني و تقطع لحمي
و من بقي تشيل قال إيه... رغيفك!!!
و كل سنة تخرب مالطة
و بعدها تعمل يافطة
إن إنت صوتك قال منبوح
يا عم روح
شفناك خلاص رابط الأرطة
بس السنة دي مفيش أختها
أنا شفتها
جية بغيظها و بعقلها
حتى لو قرصوا ودنها
حالفة لتاخد حقها
فستان جديد
فستان لا فيه رقع الوطني
ولا أقول ...بطني
من الحزام اللي شفطني
وبشخص واحد وربطني
فستان بيكسي ولا يعري
مبقلعوش من طول حري
وف طوبة مابقاش كركوبة
وف سفري أركب المجري
فستان جديد..لكن أصلي
مابستعرش من أصلي
ينطق بالعربي يقول الله
ماهو فيه مكان علشان أصلي
يعني الخلاصة السنة ديه
حنلم نعمل جمعية
تعمل لنا فستان ألوان
وكل لون يبقاله مكان
ينفع أصلي بيه منستش
ده كل لعيب ليه في الماتش
و كل واحد و له لسان
علشان يحافظ ع الفستان
يجي العريس يمين شمال
أو حتى يجي بأي جمال
أهم حاجة و أهم نتيجة
العصمة تبقى في إيديا
وإبنه ....عند أم خديجة
ليست هناك تعليقات:
إرسال تعليق