سنة جاية و عمر يطول
ومفيش حاجة تدوم على طول
ياللي بتعمل علشان بكرة
بكرة لربك إيه حتقول
سنة تتمم التمانين
وتشيل من بيتنا التموين
إقتصاد فلة و ومنور
لو تمانين مليون حاسين
سبعة وعشرين سنة فاتت
والقطط حيتان وزادت
والحاجات العامة غرقت
واللي عامت أهي إتباعت
الهنود أصحاب مصانع
والشباب ضايع وصايع
واللي مش موجود في قهوة
حتلاقيه في البحر واقع
كام سنة حكم الحديد
والمحلة نزيف جديد
واللي واقف في البلكونة
كان قتيل ولا شهيد
إبن مصر النائب العام
اللي بيوزن الكلام
جالي سؤال في التاريخ
دنشواي من سنة كام؟؟؟
يا طوارئ السنادي
لا تتمدي ولا تتمادي
واللي يسلق القانون
يبقى ع الإرهاب بينادي
لو سامعني قوم و فكر
سيبك بقى من حكم العسكر
حكم خلى الناس تنابلة
والبواقي شيوخ منصر
خليك مينا للمصريين
اللي وحد الشعبين
شعب جوه الشرم عايش
وشعب في الطابور واقفين
كلمة أخيرة ياللي هناك
لو حتغير إحنا معاك
لو حتنفذ أمر الحاشية
يبقى ربنا يتولاك
تحديث ....... أولا مبروك لسامي الحاج ..... وعقبال كل المعتقلين ....... هناك ..... وفي مصر
ثانيا ده بانر عامله بإديا و حياة عنية ......
http://picasion.com/pic2/2031f648d2d238414a2483515ce38668.gif
وما باليد حيلة ........ بعيد عنك يا مصر
مفيش غير الهوليلة ..... تصحي ناس القصر
ودمتم
ليست هناك تعليقات:
إرسال تعليق