رجعنالكم بعد الفاصل
طبعا إخواتنا و أولادنا بيطحنوا و يعتقلوا دلوقت في كل حتة في مصر...والناس متابعة و بتتفرج و يمكن كمان بتقزقز لب و هي بتتابع الأخبار.
و مجتمع التدوين المصري نفسه...مش عارف الشعب مابيتكلمش ليه!!!!!!
خلونا منتكلمش في حتة ليه دي دلوقت.....خلينا نقول هو المفروض يتكلم ليه
حيتكلم علشان الدستور حيتعدل...أو حيتغير
يااا راااااجل....مش كنت تقول كده من الصبح!!!!!
هو دستور يعني إيه؟؟؟
الدستور يا سيدي هو العقد اللي بينك وبين الريس
بيني وبين حسني مبارك!!!!إنت حتخرف؟؟؟
لأ....إصحى معايا....أولا هو عقد بينك و بين الريس...أي ريس ربنا يبتليه بحكم الشعب يعيني...و مش بس الريس...ده كل مجموعة ليها سلطة في البلد
بمعنى إنك بتقول في الدستور ده ...يا إسمك إيه إنت....أنا حديلك السلطة إنك تبقى الريس....بشرط واحد...إنك تحترم الدستور بتاع مصر
لو محترمتش الدستور...ملكش الحق في حكم مصر....و الدستور ده بيه حتاخد سلطات....مش اللي بتنزل قبل الأكل دي...اللي بتخلي النفر من كلمة واحدة يروح يمين أو يروح شمال......بس تنفذ كل حاجة موجودة في الدستور...تطلع قوانين بحكم الدستور......تبيع الدولة بحكم الدستور....تزود مرتبات الناس بحكم الدستور....تقطع عليهم مية ونور برضه بحكم الدستور...ومش بحاجة غير كده
ماشي يا عم فهمنا يعني إيه دستور...إيه بقى الموضوع؟؟؟
الموضوع إن اللي إنت جايبه يشتغل عندك...بيغير في العقد اللي بينه وبينك بمزاجه.....من غير ما يستأذنك...وجايب شوية بارافانات....كراسي.....و ممسكها الطبلة...و عامل حفلة إنك رضيت بتغيير العقد ....مع إنك يا عيني لا تعرف إيه هو العقد القديم ولا الجديد
طب يا عم مانا كنت عايش من غير ما أعرف القديم كان فيه إيه....يبقى أديني عايش من غير ما أعرف الجديد حيبقى فيه إيه
ماشي...ده في حالة إذا كنت متأكد إنك حتبقى فعلا عايش... وحتى ولادك حيعيشوا من بعدك......ولا حيعيشوا ميتين؟؟؟
إيه يا عم فيه إيه؟؟؟؟العمر واحد و الرب واحد...ربك هو اللي بيرزق يا عم...إنت حتكفر؟؟؟
ربنا يبعدنا عن الشرك...بس شوف التمثيلية دي و قولي مين اللي حيكفروه و يطلعوا.....يطلعوا اللي يطلعوه بقى...إتفرج يا سلام على تمثيلية مكونة من 34 حلقة بس منعا للبواخة حنضم كذا حلقة مع بعض و نخلص
أول حلقة حنضمها مع تسع حلقات مع بعض يبقى عشر حلقات مرة واحدة بعنوان "الإشتراكية و عز بيعز عليا"
مشهد: بالليل و الدنيا ضلمة
في صيف سنة 2007
الساعة بقت إتناشر و إبراهيم مجاش من الصبح
الست نيمت العيال بالعياط.....و أخيرا الأفندي شرف...كنت فين يا راجل؟؟......من الصبح لا حس ولا خبر.....حاولت أتصل بيك في الغل التليفون بتاعنا بيقول رسالة غريبة كده...مش عارفة إدفعوا اللي عليكم لنحجز على الشقة...حاجة كده...المهم...كنت فين؟؟؟و مالك مذبهل كده و طالع من هدومك...إيه اللي حصل؟؟
يرد إبراهيم و يقولها كلمة واحدة....إتسرقت......ويترزعوا هما الإتنين على الكراسي...اللي بقت على الخشب خلاص...بس الغريبة إنهم ما قالوش أي....متعرفش ليه!!!!
بعد وقت مش قليل إتكلمت أم العيال......إزاي؟؟؟؟بعد وقت مش قليل برضه....يرد إبراهيم و يقولها...أصل أنا قبضت النهاردة......ولقيتهم مدينلي زيادة 3%.....قلت خير...رزق العيال...حتى أكتر من الزكاة بشوية.....و قعدت أفكر أعمل إيه بالزيادة......قلت إحنا لازم نبر على نفسنا شوية...مع طبق الفول اللي حنتغدى بيه...نحط حبة طحينة...جيت أشتري طبق الفول لقيته زاد 20%...و العيش زاد 60%...قلتلهم هو إيه اللي حصل؟؟.....لقيت الناس كلها في نفس واحد بتقول...إشتراكية بح...واوا يح يح..أنا قلت الناس دول مجانين...قلت أروح و أمري لله...رحت المحطة علشان ألحق الأوتوبيس....لقيت المحطة فاضة من الناس و الأوتوبيسات واقفة و نضيفة و حاجة إيه منورة....قلت خير يا رب....ده أنا آجي كل يوم في نفس الميعاد أركب من الحتة دي....طلعت من عند السواق....لقيته بيقولي إتفضل يا فندم.....قلت أهلا...جينا بقى للكاميرا الخفية....نعم يا عم الظريف؟؟؟....قاللي ..أستأذن حضرتك في تمن التذكرة....بحط إيدي في جيبي....لقيت يافطة مكتوب عليها...تم زيادة تمن التذكرة بنسبة 120% لتصبح...لتصبح على خير يا عم الأمور...هو فيها لتصبح...أنا حخدها كعابي.....فيه إيه يا جماعة؟؟؟..ألاقيه يقلب لسانه و يقولي...كعابي يا عم الحاج...طرقنا طيب بلاش أنعرة....مانتوش قد الأوتوبيسات بتفكروا فيها ليه كتكوا القرف...خلاص يابا....إشتراكية بح...واوا يح يح
لفيت في البلد...ماشي على رجليا لحد ما وصلت البيت....محستش بحاجة أعرفها في البلد...لحد لما وصلت هنا
وأمال يا راجل بتقول إتسرقت إزاي؟؟؟.....بصي يا ستي...المرتب كله أهو....لو عرفتي تجيبلنا طقة واحدة في اليوم لمدة 10 أيام....ملكيش دعوة بشغل البيت..أنا حشتغل جوه البيت وبره البيت كمان...وحاخد بالي من العيال و كل حاجة...إنتي بس...أكلينا طقة واحدة في اليوم
ينام إبراهيم وعقله مش راضي ينام...كوابيس مالهاش حصر بتجري ورا بعض...شاف البلد مقطوع عنها الكهربا إلا العمارات العالية أوي ...و المدن اللي بتيجي في البرامج السياحية......و الجلابية بقت الزي الرسمي للشعب.....و كل عمارة بتخفر بير مية تحتها علشان الشرب.....وهو بيحلم لسة ببكرة...فجمع ولاده علشان يعملوا قرعة و يشوفوا يختاروا مين...علشان يبيعوه و يدخلوا الواد الكبير كلية الشرطة....يصحى إبراهيم مفزوع....يكتشف إن النور مقطوع.....يحاول يمشي من بين رووس العيال لحد ماوصل للشباك....و أول لما يوصل للشباك...يفتح بقه على الآخر..ويقع من طوله.....تعالوا نشوف إيه اللي في الشباك!!....الله أكبر....البلد كلها مقطوع عنها الكهربا....مفيش غير بعض العمارات اللي في الحي الراقي....و ضوء من بعيد جاي من عند المدينة الجديدة...اللي مابيدخلوهاش إلا بالباسبور
تتر الحلقة
إسمع بقى سيدة مصر الأولى.....إيمان البكري
هناك 4 تعليقات:
ازيك ياشادي
والله وحشتني جدا ووحشتنى رسائلك
بص بقى ياعم الحاج ايه الموضوع ده فرسنى جدا ومتغاظة منه بالنسبة للشعب المصري من زمان وهو بيحب الحكومة هية اللى تمشيه ومبيحسش بالصدمة الا لما ياخد على دماغه أنا عارفة اغن كلامي هيزعل ناس كتير توى بس هيه دي الحقيقة احنا معندناش وعى سياسي ولا نعرف حقوقنا ابدا وبعدين بالنسبة للدستور الجديد ده انا بقى مش عاجباني فيه عدة حاجات
أولا / ان الاستفتاء جاي بانك تقبل كل المواد ومش ممكن تختار \اي واحدة فيهم يعنى يتوافق ع الكل يابلاش بالذمة ده اسمه كلام هيه دي الديموقراطية
ثانيا / هما لغوا الاشتراكية في المواد يعنى حذفوا كلام وحطوا كلام ملوش معنى بحجة توزيع العدالة الاجتماعية لما نشوف خلينا ماشين وراء الكداب ....
نفسي يتكلموا عن غلاء الأسعار عن البطالة والله نفسي اشتغل أنا تعبت خلاص نفسي اتجوز وأخد شقة ليه ولا مش من حقى حرااااااااااااااااااااام بص بقى انا عندي اكتئاب شديد كل مرة اقول مش هتكلم في الموضوع ده وبرجع
مروة أمين
الله عليكي يا مروة يا أمين
أنا حقولهالك بطريقة اللمبي
إنتي وقفتي على نقطة الموضوع
الغلاء...البطالة...هو أي شعب عايز إيه من الحكومة؟؟ يشتغل...و يعيش كويس
بعده ممكن يجيله كده حالة تطلعات و يقولك كرامة وحرية و كده يعني....
وعلى رأي المثل...عض قلبي ولا تعض رغيفي
إنما يبقى الرغيف و القلب!!!ده يبقى وجع قلب
حاولت رؤية شريطك المصور لكنه لم يشتغل.
يبدو ان الدول العربية تعاني من نفس المشاكل وتعودت على كذب حكوماتها.
انا مغربية .
http://les-safiots.over-blog.org/
السلا م عليكم ورحمة الله
تحياتي لك ولامثالك من شباب مصر الاحرار
اتمني لك كل التوفيق في نضالك من اجل مصرنا التي ضاعت علي يد هذا النظام
عبدالله الخياط
كاتب وباحث
saveegypt@yahoogroups.com
إرسال تعليق